वैद्यकीय अधिकारी उपलब्ध नसल्याने प्रसूतीत बालकाचा मृत्यू
ऐन दिवाळीत आदिवासी कुटुंबावर दुःखाचा डोंगर
मोखाडा, ता. २३ (बातमीदार) : ऐन दिवाळीत मोखाडा ग्रामीण रुग्णालयाच्या हलगर्जीमुळे एका आदिवासी कुटुंबाला नवजात बाळ गमवावे लागल्याची घटना घडली आहे. खोडाळा येथील वैशाली अशोक बात्रे यांना बुधवारी (ता. २२) सकाळी प्रसूतीसाठी मोखाडा ग्रामीण रुग्णालयात दाखल करण्यात आले होते; मात्र रुग्णालयात प्रसूतीदरम्यान संबंधित वैद्यकीय अधिकारी हजर नव्हते. केवळ एका परिचारिकेच्या भरवशावर बात्रे यांना १२ तास ठेवण्यात आले.
रुग्णालयात प्रसूतीतज्ज्ञ उपलब्ध नसल्याने आणि योग्य वेळी वैद्यकीय सल्ला न मिळाल्याने रात्री १० वाजण्याच्या सुमारास झालेल्या प्रसूतीत नवजात बालकाचा मृत्यू झाला. सोनोग्राफीमध्ये बाळाची वार सुस्थितीत नसल्याचे आधीच स्पष्ट झाले होते, तरीही आवश्यक तज्ज्ञ उपस्थित नव्हते. वेळेवर मोठ्या रुग्णालयात पाठवले असते, तर बाळ वाचले असते, अशी खंत मृत बालकाचे वडील अशोक बात्रे यांनी व्यक्त केली आहे.
या घटनेमुळे मोखाडा तालुक्यात खळबळ उडाली असून, आरोग्य यंत्रणेच्या कारभारावर मोठे प्रश्नचिन्ह निर्माण झाले आहे. सत्ताधारी भाजप आणि शिवसेना शिंदे गटाच्या नेत्यांनीच ही बाब चव्हाट्यावर आणल्याने सरकारनेच आपल्या आरोग्य व्यवस्थेचे अपयश उघड केले आहे. प्रशासनाने मृत बालक आणि मातेला प्रसूतीनंतर खोडाळा प्राथमिक आरोग्य केंद्राकडे पाठवल्याचा धक्कादायक आरोपही नातेवाइकांनी केला आहे.

...म्हणून बाळ दगावले
सदर महिलेच्या बाळाला तीन नाळ असणे अपेक्षित असते. तसेच वारही सुस्थितीत असावी लागते अन्यथा प्रसूतीदरम्यान बाळ दगावण्याची शक्यता दाट असते. तसेच बाळाची त्वचाही पिवळसर असल्याने बाळ दगावले आहे, असे मोखाडा ग्रामीण रुग्णालयाचे रुग्णालय अधीक्षक डॉ. भारतकुमार महाले यांनी सांगितले आहे.