किल्ला व रांगोळी स्पर्धेत ऐरोलीकरांचा उत्स्फूर्त सहभाग
वाशी, ता. ३० (बातमीदार) ः ऐरोलीमधील साईनाथ वाडी, ऐरोली गाव येथे छत्रपती कॉलनी येथील रहिवाशांसाठी शिवसेना शिंदे सेनेचे अ‍ॅड. साहिल देविदास चौगुले यांच्या मार्गदर्शनाखाली आयोजित करण्यात आलेल्या किल्ला व रांगोळी स्पर्धेला ऐरोलीकरांचा उत्सर्फुत प्रतिसाद मिळाला. दिवाळी उत्सवाच्या पार्श्वभूमीवर आयोजित या स्पर्धेमुळे परिसरात सणासुदीचा उत्साह आणि सृजनशीलतेची झळाळी निर्माण झाली. बालगोपाळांनी साकारलेले ऐतिहासिक किल्ले आणि महिलांनी रंगवलेल्या देखण्या रांगोळ्यांनी परिसर नटून गेला होता. या स्पर्धेत रांगोळी गटात प्रथम क्रमांक शीतल जोगदंड यांनी पटकावला असून, त्यांना १५ हजार रुपयांचे पारितोषिक व आकर्षक चषक प्रदान करण्यात आला. द्वितीय क्रमांक समृद्धी मालकर यांना १० हजार रुपये आणि तृतीय क्रमांक श्रुती महाकाली यांनी मिळवला. त्यांना आठ हजार रुपये देण्यात आले. त्याचप्रमाणे किल्ला स्पर्धेत सूरज थोरात, कुणाल जयस्वाल, कौस्तुभ शिंगे आणि शोएब खान यांच्या टीमने प्रथम क्रमांक पटकावला. त्यांना २५ हजार रुपये देण्यात आले. त्याचप्रमाणे द्वितीय क्रमांक यश वेले यांनी पटकावला. त्यांना १५ हजार रुपये आणि तृतीय क्रमांक श्रेयस तांबोळे, मनीष मिरगणे, आयुष कोल्हे, दुर्वेश पवार व ओम जाधव यांच्या टीमने पटकावला. त्यांना १० हजार रुपये देण्यात आले, तर स्पर्धेत सहभागी झालेल्या सर्व स्पर्धकांना प्रमाणपत्रे व स्मृतिचिन्ह देऊन गौरविण्यात आले. परीक्षकांनी स्पर्धकांच्या कल्पकतेचे आणि कलाकौशल्याचे विशेष कौतुक केले. या उपक्रमामुळे मुलांमध्ये देशभक्तीची भावना, ऐतिहासिक वारशाची जपणूक आणि सर्जनशीलतेचा विकास साधला गेल्याचे मत आयोजकांनी व्यक्त केले.