सरदार वल्लभभाई पटेल, इंदिरा गांधी यांना अभिवादन
कल्याण (वार्ताहर) ः भारताचे पहिले उपपंतप्रधान आणि गृहमंत्री लोहपुरुष सरदार वल्लभभाई पटेल यांच्या जयंतीदिनी आणि भारताच्या पहिल्या महिला पंतप्रधान इंदिरा गांधी यांच्या पुण्यतिथीदिनी शुक्रवारी (ता. ३१) कल्याणमध्ये अभिवादन करण्यात आले. महापालिकेचे अतिरिक्त आयुक्त हर्षल गायकवाड यांनी सरदार वल्लभभाई पटेल आणि श्रीमती इंदिरा गांधी यांच्या प्रतिमेस पुष्पहार अर्पण करून त्यांना आदराने अभिवादन केले. या वेळी प्रशासकीय अधिकारी भारत बोरनारे, शिक्षणाधिकारी विजय सरकटे, माहिती व जनसंपर्क अधिकारी माधवी पोफळे, सुरक्षा अधिकारी भरत बुळे आणि इतर कर्मचाऱ्यांनी दोन्ही नेत्यांच्या प्रतिमेस पुष्प अर्पण करून आदरांजली वाहिली. सरदार वल्लभभाई पटेल यांच्या जयंतीदिनी राष्ट्रीय एकता दिन साजरा केला जातो. त्यानिमित्ताने सर्व उपस्थित अधिकारी व कर्मचाऱ्यांनी देशाच्या एकतेची आणि अखंडतेची शपथ घेतली.