चोरीला गेलेली बुद्धमूर्ती अवघ्या २४ तासांत हस्तगत
घाटकोपर, ता. १६ (बातमीदार) ः विक्रोळी पूर्वेतील कन्नमवारनगरातील रत्नबोधी बुद्ध विहारातून चोरीला गेलेली भगवान गौतम बुद्धांची जापनीज बनावटीची पंचधातूची मूर्ती विक्रोळी पोलिसांनी अवघ्या २४ तासांत शोधून काढत दोघांना अटक केली आहे. १३ नोव्हेंबरला सकाळी नऊच्या सुमारास ही मूर्ती चोरीची घटना घडली होती. याप्रकरणी विक्रोळी पोलिस ठाण्यात गुन्हा दाखल केला होता.
तातडीने तपास पथकांना तैनात करून परिसरातील तसेच रेल्वेस्थानकांवरील सुमारे १३० सीसीटीव्ही कॅमेऱ्यांचे फुटेज तपासण्यात आले. त्यातून एक संशयित व्‍यक्‍ती जड पिशवी घेऊन जाताना दिसून आला. तपास पुढे नेत दादर आणि माहीम परिसरातील फुटेज तपासले असता आरोपी एका भंगारविक्रेत्याकडे मूर्ती विकायला गेल्याचे समोर आले. तत्काळ कारवाई करीत पोलिसांनी भंगारविक्रेत्यास ताब्यात घेऊन चौकशी केली असता, त्याच्याकडून चोरीची बुद्धमूर्ती हस्तगत करण्यात आली. त्यानंतर मुख्य आरोपीलाही खार परिसरातून अटक करण्यात आली.
या कारवाईत जितेंद्र ऊर्फ जितू लखनराम बिनकर (४६) हा मूर्तीचोर आणि मार्टिन कमल कन्नन ऊर्फ मुरूगन (वय ४६) चोरी केलेली वस्तू घेणारा या दोघांना अटक करण्यात आली आहे. त्यांच्या ताब्यातून १२ किलो वजनाची पंचधातूची प्राचीन बुद्धमूर्ती तसेच कूलरचे चार नळ हस्तगत करण्यात आले. ही कामगिरी अप्‍पर पोलिस आयुक्त डॉ. महेश पाटील, पोलिस उपायुक्त राकेश ओला, सहाय्यक पोलिस आयुक्त प्राची कर्णे यांच्या मार्गदर्शनाखाली विक्रोळी पोलिसांच्या पथकाने केली.