गोरेगाव अग्निशमन केंद्रात बालकांची किलबिल
मालाड, ता. १७ (बातमीदार) : बाल अधिकार सप्ताहानिमित्त भाकर फाउंडेशनने बाल सभेतील सदस्यांसाठी गोरेगाव अग्निशमन केंद्राला शैक्षणिक भेट आयोजित केली होती. केंद्राचे प्रमुख अधिकारी संतोष इंगोले आणि अंकुश यांनी मुलांना अग्निशमन दलाचे कार्य, नैसर्गिक-मानवनिर्मित आपत्तीमध्ये कार्य करण्याची पद्धत आणि वापरातील साहित्य यांची प्रत्यक्ष प्रात्यक्षिकांसह माहिती दिली.
घरात आग लागल्यास काय करावे, स्वतःला सुरक्षित कसे ठेवावे याचे साध्या भाषेत मार्गदर्शन केले. मुलांना तातडीने बाहेर पडणे, ओल्या कापडाने नाक-तोंड झाकणे आणि शांत राहून मदत मागणे हे महत्त्वाचे उपाय सांगण्यात आले. घराबाहेर पडताना ‘पाणी-गॅस-लाइट’ बंद करण्याच्या सोप्या नियमासाठी अधिकाऱ्यांनी ‘पा-ग-ल’ हा शॉर्टकट शब्द सांगितला, जो मुलांना खूप आवडला आणि लगेच आत्मसात झाला. मुलांनी आपले अनुभव उत्स्फूर्तपणे शेअर केले आणि अनेक प्रश्न विचारले, ज्यांची उत्तरे अधिकाऱ्यांनी त्यांच्या भाषेत, सोप्या पद्धतीने दिली. भाकर फाउंडेशनचे संस्थापक ॲड. दीपक सोनावणे यांच्यासह मंगला कुमठे, जाहिदा शेख, अजय भालेराव, कस्तुरी शाहू, श्लोक गुप्ता आणि सर्व बाल सभेचे सदस्य या वेळी उपस्थित होते.