कळव्यातील संविधान स्तंभाची दुरावस्था
महापालिका प्रशासनाचे दुर्लक्ष ः नागरिक संतप्त
कळवा, ता. २५(बातमीदार) ः संपूर्ण देशात बुधवारी (ता. २६) भारतीय संविधान दिन मोठ्या उत्साहात साजरा केला जाणार आहे. अशात, मात्र कळवा पारसिक नगर रेतीबंदर नाका येथील चौकातील संविधान स्तंभाच्या स्मारकाची मोठी दुरावस्था झाली आहे. यामुळे नागरिकांनी संताप व्यक्त केला असून तातडीने दुरुस्तीची मागणी केली आहे.
एकीकडे संविधान दिन साजरा होत असताना रेतीबंदर नाका येथील चौकातील संविधान स्तंभाच्या स्मारकाची अवस्था दयनिय झाली आहे. या स्मारकाच्या पायऱ्याच्या फरश्या निघाल्या असून खालील बांधकाम खचले आहे. तसेच, स्मारकाच्या भोवताली गवतही मोठ्या प्रमाणात वाढले आहे. स्मारकाखालीच प्लास्टिक पिशव्या, बाटल्या, कागद अशा स्वरुपाचा कचराही पडला आहे. स्मारकाच्या या अवस्थेवरुन नागरिकांनी पालिकेवर रोष व्यक्त केला असून तातडीने दुरुस्तीची मागणी केली आहे. तर, या संदर्भात महापालिका अधिकाऱ्यावर कारवाई करण्याची मागणी देखील नागरिकांकडून होत आहे.

महापालिका प्रशासन या संवेदनशील प्रश्नावर डोळेझाक करते. ही भारतीय लोकशाहीची विटंबना आहे. दुर्लक्ष करणाऱ्या अधिकाऱ्यावर कारवाई व्हायला हवी.
- गोपाळ रावराणे, रहिवासी पारसिक नगर

ही बाब अतिशय गंभीर असून या संविधान स्तंभाच्या खालील कचरा तातडीने साफ करण्याचा आदेश दिला आहे.
- ललिता जाधव, सहायक आयुक्त कळवा प्रभाग समिती,