डॉ. धर्माधिकारी उद्यान खुले करा अन्यथा आंदोलन करू
राष्ट्र कल्याण पक्षाचे पालिका आयुक्तांना इशारा
कल्याण, ता. १ (वार्ताहर) : कल्याण-डोंबिवली महानगरपालिका क्षेत्रातील खडेगोळवली येथील महाराष्ट्र भूषण तीर्थरूप डॉ. नानासाहेब धर्माधिकारी उद्यान बंद असून ते नागरिकांसाठी खुले करण्याची मागणी राष्ट्र कल्याण पक्षाने पालिका आयुक्तांकडे केली आहे. तसेच, मागणी मान्य न झाल्यास आंदोलनद्वारे हे उद्यान नागरिकांसाठी खुले केले जाईल, असा इशारा राष्ट्र कल्याण पार्टीचे महासचिव राहुल काटकर यांनी दिला आहे.
मागील अनेक महिन्यांपासून खडेगोळवली येथील डॉ. नानासाहेब धर्माधिकारी उद्यान दुरुस्तीच्या कारणास्तव नागरिकांसाठी बंद ठेवलेले आहे. या उद्यानाचा परिसरातील नागरिक मोठ्या प्रमाणात सकाळी व सायंकाळी फिरण्यासाठी, व्यायाम करण्यासाठी आणि मुले खेळासाठी उपयोग करत होते. मात्र, उद्यान दीर्घकाळ बंद असल्यामुळे नागरिकांची मोठ्या प्रमाणात गैरसोय होत आहे. सद्यःस्थितीत उद्यानातील दुरुस्तीची कामे पूर्ण झाल्यानंतरही ते अद्याप नागरिकांसाठी खुले करण्यात आलेले नाही. म्हणून परिसरातील नागरिकांचा होणारा त्रास व गैरसोय लक्षात घेता डॉ. नानासाहेब धर्माधिकारी उद्यान सोमवार (ता. ८) पर्यंत खुले करण्यात यावे. अन्यथा, नागरिकांच्या वतीने राष्ट्र कल्याण पक्ष मंगळवारी (ता. ९) आंदोलन करून हे उद्यान खुले करेल, असा इशारा पालिकेला दिला आहे.