विरार, ता. ६ (बातमीदार) : प्रभाग समिती ‘डी’ आचोळे हद्दीत महापालिच्या पथकाने एका गोदामामध्ये सुमारे नऊ हजार किलोपेक्षा जास्त प्रतिबंधित केलेला प्लॅस्टिक साठा शुक्रवारी (ता. ५) जप्त केला आहे. महापालिकेच्या इतिहासातील ही आजपर्यंतची सर्वात मोठी कारवाई ठरली आहे.

आचोळे हद्दीतील नालासोपारा पूर्वेतील साडी कंपाऊंड येथील एका गोदामामध्ये प्लॅस्टिकचा साठा असल्याची माहिती महापालिकेला पथकाला मिळाली होती. त्या अनुषंगाने सहाय्यक आयुक्त जितेंद्र नाईक यांच्या नेतृत्वाखाली प्रभाग समिती ‘डी’ आचोळे विभागाचे पथक तत्काळ त्या ठिकाणी दाखल होऊन प्रतिबंधित प्लॅस्टिकचा साठा जप्तीची कारवाई सुरू केली. याबाबत माहिती मिळाल्यावर पालिका आयुक्त मनोजकुमार सूर्यवंशी व अतिरिक्त आयुक्त संजय हेरवाडे हे कारवाईच्या ठिकाणी उपस्थित राहिले होते. प्लॅस्टिकचा जप्त केलेला साठा अंदाजे नऊ टनपेक्षा जास्त असून संबंधितांवर पालिकेमार्फत दंडात्मक कारवाई करून पाच हजारांचा दंड वसूल करण्यात आला. कोणत्याही व्यापाऱ्याने प्रतिबंधित प्लॅस्टिक खरेदी किंवा विक्री करून, तसेच नागरिकांनीही प्रतिबंधित प्लॅस्टिकचा वापर करून आपले शहर विद्रूप करू नये व पर्यावरणास हानी पोहोचेल अशी कोणतीही गोष्ट करू नये, असे आवाहन आयुक्त सूर्यवंशी यांनी केले आहे.