एटीएमच्या अदलाबदलीतून ज्येष्ठाची फसवणूक
नवी मुंबई, ता. ६ (वार्ताहर) ः एटीएममधून पैसे काढण्यासाठी गेलेल्या ज्येष्ठाच्या एटीएम कार्डची अदलाबदल करून ४० हजारांची रक्कम काढण्यात आली आहे. या प्रकरणात नेरूळ पोलिसांनी अज्ञात चोरट्याविरोधात फसवणुकीचा गुन्हा दाखल केला आहे.
नेरूळ सेक्टर १० मध्ये राहणारे धोंडीराम माडभगत (७३) यांच्या पत्नीला मणक्याचा आजार असल्याने रुग्णालयात घेऊन जाण्यासाठी पैशांची गरज असल्याने नेरूळ सेक्टर दोनमधील एटीएममध्ये पैसे काढण्यासाठी गेले होते. एटीएममध्ये असलेल्या व्यक्तीने पैसे काढून देण्याचा बहाणा केला. या वेळी धोंडीराम यांना पाच हजार रुपये हवे होते, त्यामुळे त्यांनी स्वत: पैसे काढण्याचा प्रयत्न केला; पण त्यांच्या एटीएम कार्डची अदलाबदल केली. काही वेळाने त्यांच्या खात्यातून १० हजार रुपये काढून घेतल्याचा संदेश आला. या वेळी त्यांच्या खात्यातून ४० हजार रुपये काढल्याचे समजले. बँकेत चौकशी केली असता एटीएम कार्ड दुसऱ्याचे असल्याचे त्यांच्या लक्षात आले. त्यानंतर नेरूळ पोलिस ठाण्यात याप्रकरणी तक्रार दाखल केली आहे.