राज्य वीज वितरण कंपनीचा गिनीज वर्ल्ड रेकॉर्ड
एका महिन्यात ४५,९११ सोलार पंपिंग सिस्टिम्स स्थापित

मुंबई, ता. १० : महाराष्ट्र राज्य वीज वितरण कंपनी लि.ने एका महिन्यात तब्बल ४५,९११ सोलार पंपिंग सिस्टिम्स स्थापित करून गिनीज वर्ल्ड रेकॉर्ड नोंदवला आहे. हे अपूर्व यश एमएसईडीसीएलच्या दूरदर्शी नेतृत्वाचे, मजबूत अंमलबजावणी क्षमतेचे आणि शेतकरी बांधवांना सशक्त करण्याच्या कटिबद्धतेचे प्रतीक असल्याचे सांगितले जाते.
सी.आर.आय. पंप्सच्या सोलर विभागाने या सौर उपक्रमात ‘एमएसईडीसीएल’ला साथ दिली आहे. महाराष्ट्रातील १,६८६ गावांमध्ये सोलर पंप बसवून सी.आर.आय. सोलरने हजारो शेतकऱ्यांसाठी शाश्वत उपाययोजना केल्या आहेत.
कंपनीने आतापर्यंत दोन लाख १० हजारांहून अधिक आयओटी सक्षम सोलार पंपिंग सिस्टिम्स कार्यान्वित केल्या असून, देशभरात ३० लाखांपेक्षा अधिक बीईई स्टार-रेटेड, ऊर्जा-कार्यक्षम पंप तैनात केली आहेत. या सर्व उपक्रमांमुळे भारताने ७,६०० दशलक्ष किलोवॉट ऊर्जा बचत केली आहे आणि अंदाजे ६० लाख टन कार्बनडाय ऑक्साईड उत्सर्जन टाळले आहे, असे सी. आर. आय. समूहाचे अध्यक्ष जी. सौंदरराजन म्हणाले.