उल्हासनगर, ता. १६ (वार्ताहर) : उल्हासनगरच्या हिललाईन परिसरात पोलिसांच्या सतर्कतेमुळे पुन्हा एकदा मोठा अनर्थ टळला आहे. नियमित गस्तीदरम्यान तडीपार सराईत गुन्हेगार पोलिसांच्या जाळ्यात अडकला आहे. त्याच्याकडून धारदार लोखंडी कोयता जप्त करण्यात आला आहे. या धडक कारवाईमुळे परिसरात खळबळ उडाली आहे.
उल्हासनगर येथील हिललाईन पोलिस ठाण्याच्या तपास पथकाने नियमित पेट्रोलिंगदरम्यान प्रभावी कारवाई करत तडीपार गुन्हेगार आकाश भिडे याला ताब्यात घेतले आहे. गस्त घालताना भिडे फिरताना दिसून आला. पोलिसांना पाहताच तो पळून जाण्याचा प्रयत्न करू लागला; मात्र पोलिस कर्मचाऱ्यांनी तत्काळ पाठलाग करून त्याला पकडले. त्याची अंगझडती घेतली असता त्याच्याकडे कोयता आढळून आला. त्यामुळे त्याच्याविरोधात गुन्हा दाखल करून कठोर कारवाई करण्यात आली आहे. ही संपूर्ण कारवाई हिललाईन पोलिस ठाण्याच्या तपास पथकाने यशस्वीरित्या पार पाडली. पथकात पोलिस उपायुक्त सचिन गोरे, वरिष्ठ निरीक्षक संदीप शिवले यांच्या मार्गदर्शनाखाली सहाय्यक पोलिस निरीक्षक योगेश बेंडकुळे, पोलिस उपनिरीक्षक संग्राम मालकर, बाळासाहेब रावखंडे यांच्यासह इतर कर्मचारी यांचा समावेश होता.