अल्पवयीन आरोपीच्या वडिलांना जामीन नाहीच
पुणे पोर्श अपघातप्रकरणी याचिका न्यायालयाने फेटाळल्या 

सकाळ वृत्तसेवा

मुंबई, ता. १६ : पुणे पोर्श अपघात प्रकरणातील सात आरोपींना जामीन देण्यास उच्च न्यायालयाने मंगळवारी (ता. १६) नकार दिला. यामध्ये मुख्य अल्पवयीन आरोपीच्या वडिलांच्या जामीन अर्जाचाही समावेश आहे. या भीषण अपघातात दोन जणांचा मृत्यू झाला होता.

न्या. श्याम चांडक यांच्या एकलपीठाने आरोपींच्या याचिकांवर सविस्तर युक्तिवाद ऐकल्यानंतर याचिका फेटाळून लावली. न्यायालयाच्या आदेशाची सविस्तर प्रत अद्याप उपलब्ध झालेली नाही. न्यायालयाने विशाल अग्रवाल, आशीष मित्तल, आदित्य सूद, अरुणकुमार सिंह, अश्पाक मकंदर, डॉ. अजय तावरे आणि डॉ. श्रीहरी हलनोर यांना जामीन नाकारला.  सरकारच्या वतीने विशेष सरकारी वकील शिशिर हिरे आणि सहकारी सरकारी वकील संजय कोंकणे यांनी युक्तिवाद करताना, आरोपींनी या प्रकरणातील अत्यंत महत्त्वाचा पुरावा म्हणजेच अल्पवयीन आरोपीच्या रक्ताचे नमुने बदलले. शिवाय, या प्रकरणातील साक्षीदार हे वैद्यकीय विद्यार्थी आणि पदपथावरील गरीब व्यक्ती आहेत. आरोपींची जामिनावर सुटका झाल्यास साक्षीदारांना धमकावण्याची शक्यता असल्याचेही आरोपींच्या याचिकेला विरोध करताना सरकारकडून सांगण्यात आले.