कोंडीवरून शिवसेना-मनसे आयआयटी प्रशासनावर धडक; ‘मूड इंडिगो’मुळे नागरिकांना मोठ्या गैरसोयी
घाटकोपर, ता. १८ (बातमीदार) ः आयआयटी मुंबई येथे सुरू असलेल्या ‘मूड इंडिगो’ या सांस्कृतिक महोत्सवाच्या पार्श्वभूमीवर परिसरात निर्माण झालेल्या वाहतूक कोंडीबाबत शिवसेना-मनसेच्या पदाधिकारी व कार्यकर्त्यांनी आयआयटी प्रशासनाशी चर्चा केली. या वेळी वाढलेली गर्दी, अपुरे वाहतूक व्यवस्थापन आणि त्यामुळे नागरिकांना होणारा त्रास याबाबत प्रशासनाचे लक्ष वेधण्यात आले.
महोत्सवाच्या पहिल्याच दिवशी काही भागांत वाहतूक संथ झाल्याने भांडुप, पवई, साकीनाका तसेच गोरेगाव परिसरातील नागरिकांना मोठ्या गैरसोयींचा सामना करावा लागल्याची भावना पदाधिकाऱ्यांनी व्यक्त केली. कार्यालयीन वेळेत वाहनांच्या रांगा लागल्याने दैनंदिन कामकाजावर परिणाम झाल्याचेही सांगण्यात आले.
दरम्यान, परिस्थितीची गंभीरता लक्षात घेऊन आयआयटी प्रशासनाने तत्काळ उपाययोजना केल्या आहेत. सुरक्षेच्या आणि वाहतूक व्यवस्थेच्या दृष्टीने ‘मूड इंडिगो’च्या सर्व कार्यक्रमांसाठी करण्यात आलेली पूर्वनोंदणी रद्द करण्यात आली आहे. तसेच स्पर्धांमधील नोंदणीकृत सहभागी आणि आयआयटी बॉम्बेतील कॅम्पस रहिवासी वगळता इतर बाहेरील व्यक्तींना प्रवेश देण्यात येणार नसल्याचा निर्णय घेण्यात आला आहे.
परिस्थितीचा सातत्याने आढावा घेऊन पुढील निर्णय घेतले जातील, असेही आयआयटी प्रशासनाकडून स्पष्ट करण्यात आले. या वेळी शिवसेना-मनसेचे पदाधिकारी व कार्यकर्ते उपस्थित होते.