वायबग्योर गोरेगाव संघाला दुहेरी मुकुट
पीव्हीजी बास्केटबॉल स्पर्धा

घाटकोपर, ता. १८ (बातमीदार) : पीव्हीजी शाळेतर्फे आयोजित करण्यात आलेल्या ‘पीव्हीजी कॉन्क्वेस्ट गेम्स २०२५’ अंतर्गत बास्केटबॉल स्पर्धेत वायबग्योर गोरेगाव संघाने दुहेरी मुकुट पटकावले.
११ वर्षांखालील मुलींच्या गटात वायबग्योर गोरेगाव संघाने प्रथम क्रमांक पटकावला. या गटात सिंघानिया संघाला द्वितीय आणि सोमय्या संघाला तृतीय क्रमांकावर समाधान मानावे लागले. १४ वर्षांखालील मुलींच्या गटातही वायबग्योर गोरेगाव संघाने विजेतेपदावर आपले नाव कोरले. सेंट अँथनीज संघ उपविजेता ठरला, तर सिंघानिया संघ तृतीय क्रमांकावर राहिला. १६ वर्षांखालील मुलींच्या गटात सेंट अँथनीज संघाने प्रथम क्रमांकावर मोहर उमटवली. फातिमा संघ द्वितीय आणि सिंघानिया संघ तृतीय क्रमांकावर राहिले.
विजेत्या संघांना समन्वयिका शुभांगी जाधव यांच्या हस्ते स्मृतिचिन्ह, सन्मानपत्रे व पदके प्रदान करण्यात आली. या स्पर्धेसाठी बास्केटबॉल प्रशिक्षक सोनी झोरे यांचे सहकार्य लाभले. या क्रीडा महोत्सवाचे आयोजन पीव्हीजी शाळेचे कार्याध्यक्ष राजेंद्र बोऱ्हाडे यांच्या मार्गदर्शनाखाली झाले.

मुलांमध्ये बॉम्बे स्कॉटिशला विजेतेपद
११ वर्षांखालील मुलांच्या गटात बॉम्बे स्कॉटिश संघाने विजेतेपद पटकावले, तर सिंघानियाने द्वितीय आणि पीव्हीजी ‘ए’ संघ तृतीय क्रमांकावर राहिला. १४ वर्षांखालील मुलांच्या गटात वायबग्योर गोरेगाव संघ विजेता ठरला, तर बॉम्बे स्कॉटिश आणि सिंघानिया संघांनी अनुक्रमे द्वितीय व तृतीय क्रमांक मिळवला. १६ वर्षांखालील मुलांच्या गटात बॉम्बे स्कॉटिश संघाने विजेतेपद आपल्या नावे केले. या गटात स्कॉटिश आणि बॉम्बे संघांनी अनुक्रमे द्वितीय व तृतीय क्रमांक पटकावले.