भिवंडीत अमोनिया वायूची गळती
भिवंडी, ता. १९ (वार्ताहर) : मानकोली येथे शुक्रवारी (ता. १९) सकाळी एका कंपनीच्या प्लांटमधून अमोनिया वायूची गळती झाल्याची घटना घडली. यामध्ये कोणीही जखमी झाले नसल्याने दुर्घटना टळली आहे. ही घटना ब्ल्यू ओशियन प्रा. लि. कंपनीच्या वेअरहाउस प्लांटमध्ये शुक्रवारी सकाळी घडली. अचानक अमोनिया वायूची गळती झाल्याने परिसरात भीतीचे वातावरण पसरले होते. या कंपनीत खाद्यपदार्थ व आईस्क्रीम कूलिंग करण्यात येत असल्याने मोठा साठा या गोदामात होता. या घटनेची माहिती मिळताच अग्निशमन दलाच्या दोन गाड्या तातडीने घटनास्थळी दाखल होत त्यांनी पाण्याचा मारा करत हवेत पसरत असलेला अमोनिया वायू नियंत्रणात आणला. त्यानंतर येथील अमोनिया वायूची गळती थांबल्याने परिस्थिती आटोक्यात आली.