डॉक्टरविरोधात बलात्काराचा गुन्हा

पनवेल, ता. १९ (वार्ताहर) ः कळंबोलीत एका ५९ वर्षीय डॉक्टरने एका महिलेला लग्नाच्या भूलथापा देऊन गेल्या सात वर्षांपासून लैंगिक अत्याचार करत तिला लग्नास नकार देऊन मारहाण केल्याचा प्रकार उघडकीस आला आहे. कळंबोली पोलिसांनी पीडित महिलेच्या तक्रारीवरून आरोपी डॉक्टरविरोधात गुन्हा दाखल केला आहे.
आरोपी डॉक्टर नेरूळ येथे राहण्यास असून त्याचा कळंबोली परिसरात दवाखाना आहे, तर ४९ वर्षीय पीडित महिला त्याच भागात राहण्यास असून दोघेही विवाहित असून त्यांना मोठी मुले आहेत. २०१९ मध्ये पीडिता या डॉक्टरकडे उपचारासाठी गेली असताना तिची डॉक्टरसोबत ओळख झाली. त्यानंतर या ओळखीचे रूपांतर प्रेमात झाल्यानंतर त्यांच्यामध्ये शरीरसंबंधदेखील निर्माण झाले. गेल्या सात वर्षांत डॉक्टरने या महिलेसोबत स्वत:च्या क्लिनिकमध्ये तसेच कर्जत येथील एका लॉजमध्ये अनेक वेळा लैंगिक अत्याचार केले.
दरम्यान, आरोपी डॉक्टरने लग्नाच्या भूलथापा देऊन लैंगिक अत्याचार केल्याची तक्रार पीडित महिलेने पोलिस ठाण्यात केली आहे. डॉक्टरने पहिल्या पत्नीपासून घटस्फोट घेऊन पीडित महिलेसोबत विवाह करण्याचे आश्वासन दिले होते; मात्र डॉक्टरने तिला नकार देऊन मारहाण केल्याचा आरोप करण्यात आला आहे. याप्रकरणाचा पोलिस अधिक तपास करीत आहेत.