दादर, अंधेरी, सांताक्रूझमध्ये कमी दाबाने पाणीपुरवठा
सोमवारपासून पाच दिवस समस्या

सकाळ वृत्तसेवा
मुंबई, ता. १९ ः दादर, अंधेरी पूर्व, सांताक्रूझ पूर्व या विभागातील मोठ्या आकाराच्या जलवाहिनी जोडणीचे काम हाती घेतले जाणार आहे. हे काम सोमवारी (ता. २२) सकाळी १० वाजल्यापासून शुक्रवारी (ता. २६) मध्‍यरात्रीनंतर १ वाजेपर्यंत (एकूण ८७ तास) सुरू राहणार आहे. परिणामी, या विभागातील काही भागांचा पाणीपुरवठा कमी दाबाने होणार आहे. तसेच नियमित पाणीपुरवठ्याच्‍या वेळेतदेखील बदल होणार आहे. नागरिकांनी पुरेसा पाणीसाठा करून ठेवावा, असे आवाहन पालिकेने केले आहे.
एमएमआरडीएच्‍या मेट्रो लाइन ७ अ प्रकल्पाच्या कामासाठी २,४०० मिलिमीटर व्यासाच्या अपर वैतरणा मुख्य जलवाहिनीचा काही भाग वळविण्यात आला आहे. या वळविण्यात आलेल्या भागाचे छेद-जोडणीचे काम पालिकेमार्फत करण्यात येणार आहे. ही कार्यवाही अत्यंत महत्त्वाची असून नियोजनबद्ध पद्धतीने व तांत्रिक निकषांचे पालन करून करण्यात येणार आहे. यादरम्यान नागरिकांना पाणीपुरवठ्यात कमीतकमी अडथळा येईल, यासाठी आवश्यक ते नियोजन करण्यात आले आहे.
...
दादर विभाग
धारावी लूप मार्ग, ए.के.जी. नगर, जस्मिन मिल मार्ग, माटुंगा कामगार वसाहत, संत रोहिदास मार्ग, ६० फूट मार्ग, ९० फूट मार्ग, संत ककैय्या मार्ग, एम.पी. नगर ढोरवाडा, महात्मा गांधी मार्ग या भागात कामाच्या कालावधीत दररोज सकाळी ९ ते सायंकाळी ५ या वेळेत कमी दाबाने पाणीपुरवठा होईल, तसेच धारावी मुख्य मार्ग, गणेश मंदिर मार्ग, दिलीप कदम मार्ग, जस्मिन मिल मार्ग, माहीम फाटक, ए.के.जी. नगर या भागात कामाच्या कालावधीत सायंकाळी ५ ते रात्री १० या वेळेत कमी दाबाने पाणीपुरवठा होईल.
...
अंधेरी पूर्व विभाग
कबीरनगर, बामणवाडा, पारसीवाडा, विमानतळ क्षेत्र, तरुण भारत वसाहत, इस्लामपुरा, देऊळवाडी, पी ॲण्ड टी वसाहत या विभागात कामाच्या वेळेत दररोज दुपारी २ ते सायंकाळी ५.३० या वेळेत कमी दाबाने पाणीपुरवठा होईल, तसेच कोलडोंगरी, जुनी पोलिस गल्ली, विजयनगर (सहार रस्ता) मोगरापाडा कामाच्या कालावधीत दररोज सायंकाळी ५ ते रात्री १० या वेळेत कमी दाबाने पाणीपुरवठा होईल.
...
सांताक्रूझ विभाग
वांद्रे-कुर्ला संकुल (बीकेसी) मोतीलालनगरसह या भागातही कामाच्या काळात दररोज रात्री १० ते रात्री ११.४० या वेळेत कमी दाबाने पाणीपुरवठा होईल. तसेच प्रभात वसाहत, टीपीस-३, आग्रीपाडा, कलिना, सीएसटी मार्ग, हंसभुग्रा मार्ग, विद्यापीठ, सीएसटी मार्गाची दक्षिण बाजू, यशवंतनगर, सुंदरनगर, कोलिवरी गाव, तीन बंगला, शांतीलाल कंपाउंड, पटेल कंपाउंड, गोळीबार मार्ग, खार भुयारी मार्ग (सब-वे) ते खेरवाडी, नवापाडा, बेहराम नगर, ए. के. मार्ग, शासकीय वसाहत वांद्रे (पूर्व) या विभागात कामाच्या कालावधीत दररोज मध्यरात्री ३.३० नंतर ते सकाळी ९ या वेळेत कमी दाबाने पाणीपुरवठा होईल.