२२ वर्षीय अंजली टाक गंभीर जखमी
पुढील तीन महिन्यांत लग्न; बिबट्याचा तोंडावर हल्ला

सकाळ वृत्तसेवा
मुंबई, ता. १९ ः भाईंदरमध्ये एका राहत्या इमारतीच्या बाल्कनीवर चढून बिबट्याने केलेल्या हल्ल्यात २२ वर्षीय अंजली टाक ही तरुणी गंभीर जखमी झाली आहे. बिबट्याच्या हल्ल्यात तिच्या डोक्याला, चेहऱ्याला आणि नाकावर जबर जखमा झाल्या आहेत, तिच्यावर पालिकेच्या केईएम रुग्णालयात उपचार सुरू असून प्लॅस्टिक सर्जरी केली जाणार आहे.

अंजलीच्या नाकाला फ्रॅक्चर झाले असून डोळ्याला सूज आहे; मात्र नाकाचे फ्रॅक्चर शस्त्रक्रिया करून काढले जाऊ शकते, असे डॉक्टरांनी सांगितले. तर, तिच्या डोळ्यांना गंभीर दुखापत झाली असली तरी तिची दृष्टी पूर्णपणे चांगली आहे. तिचे भाऊ भावेश कुमावत यांनी ‘सकाळ’ला दिलेल्या माहितीनुसार, अंजलीचे पुढच्या तीन महिन्यांत लग्न होते. आता या हल्ल्यामुळे तिच्या चेहऱ्यावर गंभीर जखम झाल्या असून तिला प्लॅस्टिक सर्जरीची गरज आहे; पण एवढ्या राहत्या वस्तीत बिबट्या आला कसा आणि प्राणी मोकाट फिरत असताना वन विभाग काहीही करत नसल्याची खंत आहे. माझ्या कुटुंबाच्या सदस्यांचा थोडक्यात जीव बचावला. याच कुटुंबातील अजून तिघे जण जखमी असून त्यांच्यावर भाईंदर येथील स्थानिक रुग्णालयात उपचार सुरू आहेत. अंजलीच्या १९ वर्षीय छोट्या बहिणीलाही बिबट्याने चावा घेतला आहे.

तातडीने शस्त्रक्रिया
केईएम रुग्णालय प्रशासनाने सांगितले, की ‘अंजलीच्या चाचण्या करून जखमा किती खोल आहेत, ते तपासले जाईल. आम्ही तात्पुरते टाके मारून रक्त थांबवण्याचा प्रयत्न केला आहे. तिची प्रकृती स्थिर आहे. प्लॅस्टिक सर्जरी विभाग तिच्यावर तातडीने शस्त्रक्रिया करणार आहे. तिच्या जखमा भरण्यासाठी एक आठवडा जाऊ शकतो.’