लोकसहभागातून ग्रामविकासाचा नवा आदर्श
तारापूर, ता. २८ (बातमीदार) : डहाणू तालुक्यातील वाणगाव ग्रामपंचायतीने मुख्यमंत्री समृद्ध पंचायत राज अभियानांतर्गत विविध लोकोपयोगी योजना प्रभावीपणे राबवून विकासाचा आदर्श निर्माण केला आहे. पायाभूत सुविधांपासून ते पर्यावरण संवर्धनापर्यंत केलेल्या कामांमुळे या ग्रामपंचायतीचे सर्वत्र कौतुक होत आहे.
दुर्गम पाड्यांत सौर नळ पाणीपुरवठा योजना आणि गावात सौर दिवे बसवून ऊर्जा बचतीवर भर दिला आहे. भूजल पातळी वाढवण्यासाठी लोकसहभागातून वनराई बंधारा उभारण्यात आला. ओला व सुका कचरा व्यवस्थापनासाठी वैयक्तिक कचरा कुंड्यांचे वाटप आणि भूमिगत गटारांची कामे पूर्ण केली आहेत. कचरा विलगीकरण शेडचे कामही लवकरच सुरू होणार आहे. तसेच शाळा आणि अंगणवाड्यांचे सुशोभीकरण, सीसीटीव्ही यंत्रणा, व्यायामशाळा आणि रेन वॉटर हार्वेस्टिंग अशा आधुनिक सुविधा कार्यान्वित केल्या आहेत. दिव्यांगांना आर्थिक मदत आणि स्मशानभूमीचा विकास करून सामाजिक जबाबदारी जपली आहे.
सरपंच सुनीता भावर, उपसरपंच ब्रिजेश ठाकूर आणि ग्रामविकास अधिकारी विपिन पिंपळे यांच्या मार्गदर्शनाखाली ग्रामस्थ, कर्मचारी व युवकांच्या सहकार्याने हे विकासाचे मॉडेल उभे राहिले आहे.