शताब्दी रुग्णालयात लवकरच दोन नवे शस्त्रक्रिया विभाग
मुंबई, ता. २ : पालिकेच्या कांदिवली येथील शताब्दी रुग्णालयात ऑर्थोपेडिक शस्त्रक्रियांसाठी लवकरच दोन स्वतंत्र शस्त्रक्रिया विभाग (ऑपरेशन थिएटर) उपलब्ध होणार आहेत. सध्या ऑर्थो विभागाचे शस्त्रक्रिया विभाग दुरुस्तीच्या कामामुळे बंद आहे. मिळालेल्या माहितीनुसार, शस्त्रक्रिया विभागाचे मुख्य काम पूर्ण झाले असून काही तांत्रिक काम अपूर्ण असल्यामुळे अडचणी येत आहेत. रुग्णालयाचे अधीक्षक डॉ. अजय गुप्ता यांनी सांगितले, की उर्वरित तांत्रिक काम पूर्ण होण्यासाठी सुमारे १५ ते २० दिवसांचा कालावधी लागेल. या कालावधीत ऑर्थो शस्त्रक्रियेच्या रुग्णांना पालिकेच्याच एमडब्ल्यू रुग्णालयात हलविण्यात आले आहे. शताब्दी रुग्णालयात रुग्णांना दाखल करून आवश्यक प्रक्रिया पूर्ण केल्यानंतर शस्त्रक्रियेसाठी एमडब्ल्यू रुग्णालयात नेले जात असून शस्त्रक्रियेनंतर पुन्हा शताब्दी रुग्णालयात आणले जात आहे. दुरुस्ती आणि तांत्रिक काम पूर्ण झाल्यानंतर ऑर्थो विभागासाठी दोन स्वतंत्र शस्त्रक्रिया विभाग सुरू होतील. यापूर्वी केवळ एकच शस्त्रक्रिया विभाग उपलब्ध होता. नव्या व्यवस्थेमुळे भविष्यात रुग्णांना जलद आणि अधिक चांगल्या उपचारांचा लाभ मिळणार आहे.