ब्राह्मण विद्यालय चरई येथे सांस्कृतिक आविष्कार
वार्षिक स्नेहसंमेलन उत्साहात

ठाणे, ता. ८ : ब्राह्मण शिक्षण मंडळाच्या ब्राह्मण विद्यालय, चरई (पूर्वप्राथमिक व प्राथमिक विभाग) येथे नुकतेच वार्षिक स्नेहसंमेलन अत्यंत दिमाखात पार पडले. या सोहळ्यात विद्यार्थ्यांनी सादर केलेल्या विविध लोककलांनी आणि सामाजिक संदेशांनी उपस्थितांची मने जिंकली. ब्राह्मण शिक्षण मंडळाचे विश्वस्त हेमंत दिवेकर यांनी कार्यक्रमाचे अध्यक्षस्थान भुषविले. ब्राह्मण शिक्षण मंडळाचे चिटणीस अ‍ॅड. श्री. केदार जोशी हे प्रमुख पाहुणे म्हणून उपस्थित होते. मुख्याध्यापिका वंदना चव्हाण व पूर्वप्राथमिकच्या मुख्याध्यापिका सारिका दामले यांनी कार्यक्रमाचे नियोजन केले.

कार्यक्रमाच्या सुरुवातीला संस्थेचे माजी चिटणीस नंदकुमार जोशी साहेब यांना श्रद्धांजली अर्पण करण्यात आली. त्यानंतर पूर्वप्राथमिकच्या चिमुकल्यांनी ‘मोबाईल व आई’ या विषयावर सादर केलेल्या नाटिकेने पालकांना अंतर्मुख केले. तर प्राथमिक विभागाच्या विद्यार्थ्यांनी शिवराज्याभिषेक, लावणी, गोंधळ आणि विविध प्रांतीय लोककला सादर करून प्रेक्षकांना मंत्रमुग्ध केले. उत्कृष्ट कार्याबद्दल विद्या बोलके, शालिनी जोशी आणि किशोरी दाभोळकर या शिक्षिकांचा विशेष सन्मान करण्यात आला. किशोरी दाभोळकर व शालिनी जोशी यांनी सूत्रसंचालन केले. वैशाली भागवत यांनी आभार मानले. सामूहिक ''वंदे मातरम्'' गायनाने कार्यक्रमाची यशस्वी सांगता झाली.

विद्यार्थ्यांना मार्गदर्शन
अध्यक्षीय भाषणात हेमंत दिवेकर सरांनी शिक्षण आणि संस्कारांच्या सांगडीवर भर दिला, तर अ‍ॅड. केदार जोशी यांनी विद्यार्थी, पालक आणि शिक्षकांना नवीन शैक्षणिक वर्षासाठी प्रेरणादायी मार्गदर्शन केले. संस्थेच्या अध्यक्षा नमिता सोमन यांनीही कार्यक्रमास शुभेच्छा दिल्या.