पंजाब अँड सिंध बँकेचे मुंबईत फील्ड जनरल मॅनेजर कार्यालय

मुंबई, ता. १४ : पंजाब अँड सिंध बँकेने नुकतेच मुंबईतील त्यांच्या फील्ड जनरल मॅनेजर कार्यालयाचे उद्घाटन केले. यामुळे त्यांची विभागीय उपस्थिती बळकट होऊन त्याद्वारे पश्चिम आणि दक्षिण भारतात त्यांची कामकाजाची कार्यक्षमता साधली जाईल.
बँकेचे एमडी आणि सीईओ स्वरूप कुमार साहा यांनी या कार्यालयाचे उद्घाटन केले. त्यांनी या वेळी बँकेच्या विकास आराखड्यातील मुंबई विभागाचे धोरणात्मक महत्त्व सांगितले. या कार्यालयामुळे एकंदर देखरेख वाढून निर्णय प्रक्रिया वेगवान होईल आणि अनेक राज्यातील शाखा कार्यालयांना सहाय्य मिळेल, असेही ते म्हणाले. नंतर त्यांनी पत्रकारांशी बोलताना बँकेच्या कामकाजाची आणि पुढील वाटचालीची माहिती दिली. महिलांच्या स्वयंसहाय्यता गटांना बँक विविध प्रकारे अर्थसहाय्य करते. यापुढेही सामान्य नागरिक, कृषी आणि एमएसएमई क्षेत्रावर भर दिला जाईल. त्यातही महिलांसाठी विशेष योजना आखल्या जातील, असेही ते म्हणाले.