सातीवलीला गरम पाण्याच्या कुंडांवरील यात्रेत मोठी गर्दी
मकर संक्रांतीनिमित्त भाविकांची मोठी गर्दी; शिवमंदिर परिसरात उत्साह
मनोर, ता. १४ (बातमीदार) ः सातीवली गावच्या हद्दीत नैसर्गिक गरम पाण्याच्या कुंडांवरील शिवमंदिर परिसरात मकर संक्रांतीनिमित्त यात्रा भरली असून, भाविकांनी मोठी गर्दी केली आहे. यात्रेत गुजरातसह तलासरी, डहाणू, वसई आणि विरार परिसरातील हजारो भाविकांनी हजेरी लावली होती.
मकर संक्रांतीनिमित्त सातीवली गावातील नैसर्गिक गरम पाण्याच्या कुंडांवर भरणारी यात्रा पालघर तालुक्यात प्रसिद्ध आहे. नैसर्गिक गरम पाण्याचे झरे, शंकर मंदिर आणि शेजारून वाहणारी वांद्री नदी येथील निसर्ग सौंदर्यात भर घालते. या यात्रेची तयारी महिनाभरापासून शंकर मंदिर ट्रस्टच्या वतीने केली जात होती. ट्रस्टच्या वतीने मंदिर परिसराची स्वच्छता, रंगरंगोटी आणि रोषणाई करण्यात आली होती.
यात्रेत खेळणी, गृहोपयोगी वस्तू, लहान पाळणा, ऑर्केस्ट्रा, सुकी मासळी, किराणा सामान, मिठाई आणि निरनिराळे खाद्यपदार्थविक्रेते मोठ्या संख्येने असतात. कुंडातील पाणी आरोग्यवर्धक असल्याची श्रद्धा असल्याने यात्रेच्या दिवशी पहाटे कुंडात अंघोळीसाठी मोठी गर्दी होते. कुंडांवर जाणाऱ्या रस्त्यावर मोठी गर्दी झाल्याने महामार्गावर वाहतूक कोंडी होऊ नये यासाठी पोलिसांचा बंदोबस्त ठेवण्यात आला होता.

५० ते ६० लाखांची आर्थिक उलाढाल
यात्रेत सुमारे एक हजार दुकानदार विक्रीसाठी आले होते. निरनिराळ्या वस्तू खरेदीसाठी यात्रेत आलेल्या भाविकांची दुकानांमध्ये मोठी गर्दी झाली होती. यातून तब्बल ५० ते ६० लाखांची आर्थिक उलाढाल झाल्याचा अंदाज मंदिर ट्रस्टचे अध्यक्ष आणि सातीवली ग्रामपंचायतीचे सरपंच कृष्णा जाधव यांनी व्यक्त केला.