सेवा रस्त्यावर वाहनांचा कब्जा
चारोटीत सीएनजीसाठी वाहनांच्या रांगा
कासा, ता. १५ (बातमीदार) ः मुंबई-अहमदाबाद महामार्गावर अनेक ठिकाणी सेवा रस्त्यांची कामे अपूर्ण आहेत. नागरिकांच्या तक्रारीनंतर चारोटी येथील अनेक वर्षे अपूर्णास्थेतील सेवा रस्ता महामार्ग प्राधिकरणाने पूर्ण केला आहे; मात्र सीएनजीसाठी वाहनांनी रस्त्यावरच कब्जा केला आहे.
एशियन पेट्रोल पंपासमोरच्या रस्त्यावरील खड्डे, चिखल, अपूर्ण कामांमुळे अपघात होत होते. अनेक वर्षांच्या प्रतीक्षेनंतर अलीकडेच महामार्ग प्राधिकरणाने सेवा रस्ता घाईघाईत, थातूरमातूर पद्धतीने तयार केला; मात्र रस्ता खुला होताच सीएनजी भरण्यासाठी वाहनांच्या रांगा लागल्या आहेत. परिणामी, स्थानिकांना रस्त्याचा उपयोग करता येत नाही. विशेष म्हणजे, हा सेवा रस्ता अजून पुढे महालक्ष्मीपर्यंत वाढवावा, अशी मागणी अनेक वर्षांपासून होत आहे; मात्र त्या दिशेने कोणतीही ठोस कार्यवाही झालेली नाही. अपूर्ण सेवा रस्त्यांमुळे महामार्गावर थेट प्रवेश करावा लागत आहे.