खालापूरमध्ये रासायनिक कारखान्याला आग
खालापूर, ता. १७ (बातमीदार) ः तालुक्यातील खोपोली-पेण मार्गावर असलेल्या नारंगी गावानजीक एचपी ॲडेटिव्ह या रासायनिक कारखान्यात शनिवारी (ता. १७) रात्री आग लागली. रात्री उशिरापर्यंत आगीवर नियंत्रण मिळवण्यासाठी प्रयत्न सुरू होते. कारखान्यालगतच आदिवासी वाडी, लोकवस्ती असल्याने प्रशासन या ठिकाणी विशेष लक्ष ठेवून आहे.
तालुक्यातील छत्तीशी विभाग म्हणून डोणवत, नारंगी भाग ओळखला जातो. या ठिकाणी लहान-मोठे कारखाने आहेत. एचपी केमिकल ॲडेटिव्ह कारखान्यात जवळपास साडेचारशे कामगार काम करतात. आग लागण्याच्या घटनेच्या वेळेस शिफ्ट संपल्यामुळे केवळ चार ते पाच कामगार होते. रसायनाचे ड्रम ठेवलेल्या भागात एअर कंडिशनचा स्फोट झाल्यामुळे उडालेल्या ठिणग्यांतून आग पसरली. अतिज्वालाग्राही रसायनामुळे झपाट्याने आग वाढली. आग विझवण्यासाठी शर्थीचे प्रयत्न होत होते. आगीच्या घटनेत कोणतीही जीवितहानी झाली नसल्याची माहिती खालापूर पोलिस निरीक्षक सचिन पवार यांनी दिली आहे.