जिल्हा परिषद शाळा रोडे येथे कौशल्याधिष्ठित उपक्रम
अलिबाग, ता. २७ (वार्ताहर) : तेजस्विनी सामाजिक व सांस्कृतिक फाउंडेशन, रायगड शाखा गडबतर्फे रायगड जिल्हा परिषद प्राथमिक शाळा, रोडे येथे विद्यार्थ्यांसाठी कौशल्याधिष्ठित उपक्रमांचे आयोजन करण्यात आले. संस्थापिका जीविता पाटील यांच्या मार्गदर्शनाखाली फनी गेम्स व विविध स्पर्धांच्या माध्यमातून हा उपक्रम राबविण्यात आला.
या उपक्रमात शाळेतील अनेक विद्यार्थ्यांनी उत्स्फूर्त सहभाग नोंदवला. सहभागी सर्व विद्यार्थ्यांना भेटवस्तू देण्यात आल्या, तर विविध स्पर्धांतील प्रथम, द्वितीय व तृतीय क्रमांकाच्या विद्यार्थ्यांना संस्थेच्या वतीने बक्षिसे देऊन गौरविण्यात आले.
कार्यक्रम यशस्वी होण्यासाठी तेजस्विनी फाउंडेशनचे अध्यक्ष भावनेश मोकल, शिक्षक जयश्री म्हात्रे, सविता राऊत, संगीता पाटील, रेश्मा अंबाडे व विशाल मोरे यांनी विशेष परिश्रम घेतले. मुलांच्या कलागुणांना वाव मिळावा, त्यांना हक्काचे व्यासपीठ उपलब्ध व्हावे तसेच हसत-खेळत शिक्षणाच्या माध्यमातून शिक्षणातील उत्साह वाढावा, या उद्देशाने या कार्यक्रमाचे आयोजन करण्यात आल्याचे अध्यक्ष भावनेश मोकल यांनी सांगितले.