कामगार सेनेतर्फे अंडरआर्म क्रिकेट स्पर्धेचे आयोजन
मुलुंड, ता. २९ (बातमीदार) : म्युनिसिपल कर्मचारी कामगार सेना युनियनच्या वतीने वंदनीय बाळासाहेब ठाकरे यांच्या जयंतीनिमित्त के. ई. एम. रुग्णालयात भव्य अंडरआर्म क्रिकेट स्पर्धेचे आयोजन करण्यात आले होते. या स्पर्धेत रुग्णालयातील विविध संवर्गांतील कामगार व कर्मचारीवर्गाने उत्स्फूर्त सहभाग नोंदवला. तब्बल ४० संघांनी या स्पर्धेत भाग घेतला. ही स्पर्धा अत्यंत खेळीमेळीच्या वातावरणात पार पडली. या कार्यक्रमाला प्रमुख उपस्थिती म्हणून शिवसेना (उद्धव बाळासाहेब ठाकरे) गटाचे नवनिर्वाचित नगरसेवक सचिन पडवळ, उर्मिला पांचाळ व किरण तावडे यांनी हजेरी लावली.
या वेळी म्युनिसिपल कर्मचारी कामगार सेना युनियनच्या वरिष्ठ सरचिटणीस रचना अग्रवाल, चिटणीस संजय वाघ तसेच के. ई. एम. रुग्णालय युनिटचे अध्यक्ष देवेंद्र सावंत, उपाध्यक्ष संजय कोइलकर, पी. एल. सिंग, अमित बनसोडे, राजाराम चव्हाण आदी उपस्थित होते. या स्पर्धेत सोळंखी बॉईज (के. ई. एम. युवा ग्रुप) संघाने प्रथम पारितोषिक पटकावले, तर इलेक्ट्रिक डिपार्टमेंट (शिवगर्जना) संघाने द्वितीय आणि इलेक्ट्रिक डिपार्टमेंट ओल्ड बिल्डिंग संघाने तृतीय पारितोषिक मिळवले.