अवयवदानातून दोघांना जीवनदान, एकाला दृष्टी
मुंबई, ता. १० : मुंबई विभागात २०२६ सालातील अकरावे मृत्यूनंतरचे अवयवदान पार पडले असून, या दानामुळे दोघांना नवजीवन तर एका व्यक्तीला दृष्टी मिळणार आहे. ९ फेब्रुवारीला डोंबिवली पूर्व येथील एम्स रुग्णालयात ३६ वर्षांच्या तरुणाला डॉक्टरांनी मेंदूमृत घोषित केल्यानंतर त्यांच्या कुटुंबीयांनी अवयवदानाला परवानगी दिली. हृदय आणि यकृत हे दोन महत्त्वाचे अवयव दान करण्यात आले आहेत. त्याचबरोबर ऊती दानातून नेत्रपटल आणि त्वचेचेही दान करण्यात आले आहे. या दानामुळे दोन रुग्णांचे प्राण वाचले असून, नेत्रपटल दानामुळे एका व्यक्तीला दृष्टी मिळाली. संपूर्ण प्रक्रिया अवयव प्रत्यारोपण समिती ‘झेडटीटीसी’ यांच्या मार्गदर्शक तत्त्वांनुसार पार पाडण्यात आली, अशी माहिती देण्यात आली आहे.