२० हजारांची लाच भोवली
जव्हारमध्ये दोन तलाठ्यांना रंगेहात पकडले
जव्हार, ता.१२(बातमीदार)ः प्रधानमंत्री आवास योजनेअंतर्गत मंजूर घरकुलाच्या बांधकामासाठी खरेदी केलेला ट्रॅक्टरवरील जप्ती टाळण्यासाठी तसेच विनाअडथळा काम सुरू ठेवण्यासाठी २० हजारांची मागण्यात आली होती. या प्रकरणात दोघा तलाठ्यांना रंगेहात पकडण्यात आले आहे.
ग्राम महसूल अधिकारी गजानन जोहरे (सजा-जामसर), सीताराम इंगम (सजा-हिरडपाडा), ता. जव्हार, जि. पालघर यांनी प्रत्येकी १० हजार रुपयांची लाच मागितली होती. या तक्रारीची पडताळणी करून सापळा रचण्यात आला. मंगळवारी दुपारी तक्रारदाराकडून २० हजारांची लाच स्वीकारताना दोन्ही अधिकाऱ्यांना रंगेहात पकडण्यात आले. या प्रकरणी जव्हार पोलिस ठाण्यात भ्रष्टाचार प्रतिबंधक कायदा १९८८ (सुधारित अधिनियम २०१८) कलम ७, ७-अ व १२ अन्वये गुन्हा दाखल करण्यात आला आहे. पालघर पोलिस अधीक्षक दादाराम करांडे, ठाणे पोलिस अधीक्षक शिवराज पाटील, ठाणे अपर पोलिस अधीक्षक भागवत सोनवणे, ठाणे तथा लाचलुचपत प्रतिबंधक विभाग यांच्या मार्गदर्शनाखाली ही कारवाई करण्यात आली.