नेरूळमध्ये शिवजयंतीचा उत्साह
नेरूळ, ता. १९ (बातमीदार) : नेरूळ परिसरात छत्रपती शिवाजी महाराज यांच्या जयंतीनिमित्त ठिकठिकाणी उत्साहाचे वातावरण पाहायला मिळाले. विविध सामाजिक संस्था, मंडळे व नागरिकांच्या पुढाकाराने शिवजयंती मोठ्या जल्लोषात साजरी करण्यात आली.
सकाळपासूनच परिसरातील शिवाजी महाराजांच्या पुतळ्यांना आकर्षक सजावट करण्यात आली होती.
छत्रपती शिवरायांना अभिवादन करून पुष्पहार अर्पण करण्यात आले. यावेळी पारंपरिक ढोल-ताशांच्या गजरात मिरवणुका काढण्यात आल्या असून युवक-युवतींनी भगवे फेटे परिधान करून जय भवानी, जय शिवाजीच्या घोषणा देत परिसर दुमदुमून टाकला. काही ठिकाणी शिवचरित्रावर व्याख्याने, पोवाडे आणि सांस्कृतिक कार्यक्रमांचे आयोजन करण्यात आले होते. तसेच, लहान मुलांसाठी चित्रकला व वक्तृत्व स्पर्धाही घेण्यात आल्या. नेरूळमध्ये सर्वत्र भगवे झेंडे, रोषणाई आणि आकर्षक देखावे यामुळे शिवजयंतीचा जल्लोष अनुभवायला मिळाला. नागरिकांनी मोठ्या संख्येने उपस्थित राहून कार्यक्रमांना प्रतिसाद दिला.