केईएस लिटिल इंग्लिश स्कूलमध्ये विद्यार्थ्यांकडून उत्साहात शिवजयंती साजरी
पेण, ता. १९ (वार्ताहर) : कोकण एज्युकेशन सोसायटीच्या लिटिल इंग्लिश स्कूलमध्ये विद्यार्थ्यांनी छत्रपती शिवाजी महाराज यांची जयंती विविध उपक्रमांनी उत्साहात साजरी केली. शासकीय सुट्टी असूनही शासनाच्या आदेशानुसार शाळेत शिवजयंती कार्यक्रमाचे आयोजन करण्यात आले होते. विद्यार्थ्यांनी महाराजांच्या जन्मापासून ते शिवकालीन शिकवण, धर्मनिष्ठा यांची माहिती देत लाठी-काठीचे प्रात्यक्षिक सादर केले. याशिवाय वक्तृत्व स्पर्धा, पोवाडा सादरीकरण आणि स्वराज्य निर्मितीचा इतिहास उलगडून दाखवत उपस्थितांची दाद मिळवली. या कार्यक्रमाला मुख्याध्यापिका सविता चव्हाण, शाळा समिती सदस्य कृष्णा वर्तक तसेच शिक्षक व शिक्षकेतर कर्मचारी मोठ्या संख्येने उपस्थित होते. विद्यार्थ्यांच्या सादरीकरणामुळे शिवचरित्राचा प्रेरणादायी संदेश शाळेत घुमला.

(छायाचित्र : विद्यार्थ्यांकडून सादर करण्यात आलेले लाठी-काठी व पोवाडा सादरीकरण)