अनावश्यक आरसीसी नाल्याच्या निकृष्ट कामाविरोधात तक्रार
तीन कोटींच्या कामावर प्रश्नचिन्ह; चौकशी करून काम थांबवण्याची मागणी
नेरूळ, ता. १९ (बातमीदार) : नेरूळ सेक्टर ५० परिसरात सुरू असलेल्या अनावश्यक व निकृष्ट दर्जाच्या आरसीसी नाल्याच्या बांधकामाविरोधात राष्ट्रवादी काँग्रेस पार्टीचे नवी मुंबई जिल्हाध्यक्ष भरत जाधव यांनी महापालिका आयुक्तांकडे लेखी तक्रार दाखल केली आहे. एनआरआय वसाहतीलगत सिडकोचा नैसर्गिक पाणी निचऱ्याचा नाला अस्तित्वात असतानाही सुमारे तीन कोटी रुपये खर्चून नवीन नाला उभारण्याचे काम सुरू करण्यात आल्याचा आरोप करण्यात आला आहे. संबंधित भूखंड हा डेव्हलपमेंट इंजिनिअर सेक्टर ५० चा असून, त्या ठिकाणी नाल्याची कोणतीही गरज नसल्याचे स्थानिकांचे म्हणणे आहे.
या कामाबाबत पूर्वी हरकती नोंदवूनही कामाला मंजुरी देण्यात आल्याने आश्चर्य व्यक्त करण्यात आले आहे. या प्रकरणाची सखोल चौकशी करून अनावश्यक व निकृष्ट दर्जाचे बांधकाम तत्काळ थांबवावे तसेच जबाबदार अधिकाऱ्यांवर कारवाई करावी, अशी मागणी जाधव यांनी केली आहे.
दरम्यान, स्थानिक नागरिकांमध्ये या कामाबाबत तीव्र नाराजी असून, महापालिकेने पारदर्शकता राखत योग्य ती दखल घ्यावी, अशी अपेक्षा व्यक्त होत आहे.