ठाणे, ता. २१ : ठाणे रेल्वे स्थानकावर एका एसआरपीएफ जवानाचा महागडा मोबाईल चोरट्याने लांबवल्याची नुकतीच घडली आहे. ही घटना ताजी असताना लोकलच्या गर्दीचा फायदा घेत चोरट्याने केंद्रीय औद्योगिक सुरक्षा दलाच्या (सीआयएसएफ) जवानाचा महागडा मोबाईल लंपास केल्याची घटना पुन्हा घडली. याप्रकरणी ठाणे रेल्वे पोलिसांत तक्रार दाखल करण्यात आली आहे.
बदलापूर (पूर्व) येथील रहिवासी असलेले तक्रारदार हर्षल हंकारे (वय २६) हे सीआयएसएफमध्ये कार्यरत असून सध्या उत्तर प्रदेश येथे कर्तव्यावर आहेत. १८ फेब्रुवारीला कामानिमित्त ते ठाणे येथे आल्यानंतर परतीच्या प्रवासासाठी सायंकाळी ५.१० वाजता ठाणे रेल्वे स्थानक फलाट क्रमांक ५ वरून डाउन कर्जत जलद लोकलमध्ये चढत होते.
यावेळी पुरुषांच्या डब्यातील गर्दीतून आत प्रवेश करताना त्यांच्या खिशातून मोबाईल चोरीला गेला आहे. हा मोबाईल ४० हजार ९९९ रुपये किमतीचा असल्याचे तक्रारीत नमूद करण्यात आले आहे. याप्रकरणी ठाणे लोहमार्ग पोलिस ठाण्यात चोरीचा गुन्हा दाखल केला असून पुढील तपास सुरू आहे.