वज्रेश्वरी, ता. २२ (बातमीदार) : भिवंडी तालुक्यातील तीर्थक्षेत्र वज्रेश्वरी येथील आसरा नगरमध्ये श्रीराम उत्सव समितीच्या वतीने ४१ दिवसांचा फिरता सप्ताह छत्रपती शिवाजी महाराज जयंतीनिमित्त उत्साहात साजरा करण्यात आला. ‘एक गाव, एक सोहळा, एक उत्सव’ या संकल्पनेनुसार कार्यक्रम घेण्यात आला.

कार्यक्रमाची सुरुवात वज्रेश्वरी देवी, प्रभू श्रीराम आणि नित्यानंद भगवान यांच्या प्रतिमेचे पूजन करून करण्यात आली. यावेळी वारली रत्न कीर्तनकार हभप. हरिश्चंद्र महाराज कुवरा उपस्थित होते. मुलांसाठी सांस्कृतिक कार्यक्रम, महिलांसाठी हळदीकुंकू समारंभ, भजन तसेच विविध धार्मिक उपक्रम राबवण्यात आले. महिलांना हळदीकुंकवाचा वाण देण्यात आला, तर शालेय विद्यार्थ्यांना शैक्षणिक साहित्याचे वाटप करण्यात आले.
हभप हरिश्चंद्र महाराज कुवरा यांनी आपल्या कीर्तनातून छत्रपती शिवाजी महाराज व छत्रपती संभाजी महाराज यांच्या जीवनकार्यावर प्रकाश टाकत धर्मजागृतीचा संदेश दिला. यावेळी धर्म जागरण ठाणे जिल्हा संत संपर्क प्रमुख पराग पाटील उपस्थित होते. सप्ताहाचे संपूर्ण आयोजन वनमाळी संस्था अध्यक्षा वैशाली पाटील-ठक्कर यांनी केले. कार्यक्रमाला परिसरातील भाविकांचा उत्स्फूर्त प्रतिसाद लाभला.