विद्याभवनच्या दोन्ही शाळांना ‘ए प्लस’ श्रेणी
राज्यस्तरीय बाह्य मूल्यांकनात मानांकन; नवी मुंबईतील तीनपैकी दोन शाळा विद्याभवनच्या
नेरुळ, ता. २३ (बातमीदार) : महाराष्ट्र शासनाच्या शालेय शिक्षण व क्रीडा विभागांतर्गत राज्य शैक्षणिक संशोधन व प्रशिक्षण परिषदेमार्फत २०२५-२६ मध्ये घेण्यात आलेल्या बाह्य मूल्यांकनात विद्याभवन प्राथमिक मराठी व विद्याभवन प्राथमिक इंग्लिश या दोन्ही शाळांना ‘ए प्लस’ श्रेणी जाहीर करण्यात आली आहे. नवी मुंबईत ‘ए प्लस’ मानांकन मिळालेल्या तीन शाळांपैकी दोन शाळा विद्याभवन शिक्षण संकुलातील असल्याने संस्थेच्या शैक्षणिक गुणवत्तेची पुन्हा एकदा प्रचिती आली आहे.
विद्याभवन शिक्षण संकुलाने गेल्या वर्षी ‘मुख्यमंत्री माझी शाळा सुंदर शाळा’ या उपक्रमात ठाणे जिल्ह्यात प्रथम क्रमांक पटकावत ११ लाख रुपयांचे पारितोषिक मिळवले होते. संकुलाच्या रौप्यमहोत्सवी वर्षात मिळालेले हे मानांकन विशेष महत्त्वाचे मानले जात आहे. नियोजनबद्ध कार्यपद्धती, शिस्त, उत्कृष्ट शैक्षणिक निकाल तसेच कला, क्रीडा व स्पर्धा परीक्षांमधील यश या सर्व घटकांचा एकत्रित परिणाम म्हणून हे मानांकन मिळाल्याचे समन्वयक पांडुरंग मुळीक यांनी सांगितले.
या यशाबद्दल स्थानिक नगरसेवक सचिन लवटे, गिरीश म्हात्रे, पुणे विद्यार्थी गृहाचे कार्याध्यक्ष राजेंद्र बोऱ्हाडे, कुलसचिव दिनेश मिसाळ, पालक व शिक्षकांनी मुख्याध्यापिका सुवर्णा मिसाळ व मनिषा मुळीक यांचे अभिनंदन करून पुढील वाटचालीस शुभेच्छा दिल्या.