सायन स्थानकाबाहेरील भुयारी मार्ग सुरू

धारावी, ता. २३ (बातमीदार) : मध्य रेल्वेवरील सायन स्थानकाबाहेर धारावीतून रेल्वे स्थानकात जाण्यासाठी एक भुयारी मार्ग बनवण्यात आला होता. मात्र, वाहतूक पूल नूतनीकरणासाठी दोन वर्षांपूर्वी हा भुयारी मार्ग तोडण्यात आला होता. यामुळे धारावीकरांना रस्त्यावरून वाट काढत स्थानक गाठावे लागत होते. दरम्यान, आता पर्याय म्हणून स्थानकासमोरील लाल बहादूर शास्त्री मार्गाच्या रस्त्याखालून नव्याने एक धारावीकडे जाण्यासाठी भुयारी मार्ग सुरू करण्यात आला आहे.
महत्त्वाचे म्हणजे, या भुयारी मार्गाचे काही काम सुरू आहे. तरीही त्याचा उद्घाटनाचा सपाटा लावण्यात आला असल्याचे मत येथील स्थानिक नागरिकांनी व्यक्त केले आहे. तसेच महाविकास आघाडीतील काँग्रेस व शिवसेना (ठाकरे गट) या दोघांनी वेगवेगळ्या दिवशी या भुयारी मार्गाचे उद्घाटन केल्याने या राजकारण्याच नेमकं चाललंय तरी काय, असा प्रश्न धारावीकरांना पडला आहे. त्यातच पूर्वीच्या भुयारी मार्गाला पायऱ्या नव्हत्या. मात्र, नव्या भुयारी मार्गाला पायऱ्या असल्याने ज्येष्ठ नागरिकांसह लहान मुले, रुग्ण व्यक्ती व दिव्यांगाना त्रास होत असल्याचे चित्र आहे. त्यामुळे यावर काही तरी तोडगा काढावा, अशी मागणी धारावीकरांनी उचलून धरली आहे.