महाराष्ट्र कर्मचारी युनियनच्या पाठपुराव्याला यश
नाका कामगारांची सेवा कायम

नेरूळ, ता. २३ (बातमीदार) : महापालिकेच्या घनकचरा व्यवस्थापन विभागात कार्यरत नाका कामगारांची सेवा महाराष्ट्र कर्मचारी युनियनच्या सातत्यपूर्ण पाठपुराव्यामुळे कायम झाल्याने कामगारांमध्ये आनंदाचे वातावरण निर्माण झाले आहे. या निर्णयाच्या पार्श्वभूमीवर कामगारांनी शिवजयंती उत्साहात साजरी करत कामगार नेते व युनियनचे अध्यक्ष रवींद्र सावंत यांचा सत्कार करून आभार व्यक्त केले.
ॲन्थोनी वेस्ट हॅंडलिंग सेल लिमिटेड कंपनीमार्फत गेल्या सहा महिन्यांपासून हे कामगार घनकचरा विभागात कार्यरत होते. त्यांच्या सेवेला स्थैर्य मिळावे, यासाठी महाराष्ट्र कर्मचारी युनियनने महापालिका प्रशासनाकडे सातत्याने पाठपुरावा केला होता. यासाठी निदर्शनेही करण्यात आली होती. अखेर शिवजयंतीच्या मुहूर्तावर सेवा कायम करण्याचा निर्णय झाल्याने कामगारांनी जल्लोष साजरा केला.
कोपरखैरणे पार्किंग परिसरात झालेल्या कार्यक्रमात युनिट अध्यक्ष रवी राठोड, कंपनीचे व्यवस्थापक भोसले तसेच कर्मचारी मोठ्या संख्येने उपस्थित होते. या निर्णयामुळे कामगारांच्या भवितव्याला स्थैर्य मिळाल्याची भावना व्यक्त करण्यात आली.