विरार (बातमीदार)ः वसई पश्चिमेकडील कृष्णा टाऊनशिप परिसरातील नैसर्गिक नाल्यावर पुलाचे बांधकाम वेगाने सुरू आहे. या बांधकामामुळे खाडीच्या नैसर्गिक प्रवाहात अडथळा निर्माण होऊन पश्चिमेचा भाग पाण्याखाली जाण्याचा आरोप पालिकेची सामाजिक कार्यकर्ते मॅकेन्झी डाबरे यांनी केला आहे. नियमानुसार कोणत्याही सार्वजनिक किंवा खासगी बांधकामाच्या ठिकाणी पालिकेच्या परवानगीचा फलक लावणे अनिवार्य असतो. मात्र, कृष्णा टाऊनशिपजवळ सुरू असलेल्या कामाच्या ठिकाणी कोणताही फलक लावण्यात आलेला नाही. विशेष म्हणजे, प्रभाग समिती एचचे सहाय्यक आयुक्त हरेश्वर पाटील यांची मॅकेन्झी डाबरे यांनी भेट घेतली असता, या बांधकामाबाबत कोणतीही माहिती नसल्याचे समोर आले आहे. त्यामुळे नैसर्गिक नाल्यावर अतिक्रमण केले जात असताना पालिका अधिकारी अनभिज्ञ असल्याची धक्कादायक बाब समोर आली आहे.