रेशनवाटपात डहाणू आघाडीवर
डिजिटल प्रणालीमुळे हजारो कुटुंबांना दिलासा
कासा, ता.२५ (बातमीदार)ः डहाणू तालुक्याने शिधापत्रिका सक्षमीकरण, आधार सीडिंग, ऑनलाइन नोंदणी, डिजिटल (बायोमेट्रिक) धान्यवाटप, नियमित पुरवठामध्ये अव्वल कामगिरी केली आहे. त्यामुळे दुर्गम व आदिवासीबहुल पालघर जिल्हामध्ये आदर्श कामगिरी ठरली आहे.
तालुक्यातील सर्व पात्र शिधापत्रिकाधारक कुटुंबांना नियमितपणे धान्यवाटप होत आहे. सर्व रास्त भाव दुकाने आधुनिक डिजिटल मशीन प्रणालीने सुसज्ज आहेत. रेशन वितरणात कुटुंबातील प्रत्येक सदस्याला एक युनिट मानून धान्याचे प्रमाण ठरवले जाते. अंत्योदय योजनेअंतर्गत प्रति कुटुंब दरमहा सुमारे ३५ किलो धान्य दिले जाते, तर प्राधान्य कुटुंबांना प्रति व्यक्ती दरमहा पाच किलो धान्य (साधारण तीन किलो तांदूळ व दोन किलो गहू) वितरित केले जाते. तसेच पूर्वी हाताने नोंदी करून धान्यवाटप होत होते. मात्र, बहुतांश ठिकाणी बायोमेट्रिक प्रणाली कार्यान्वित झाली आहे.
-----------------------------------------
रेशन दुकाने - २०७
ऑफलाइन - ५
पिवळे कार्ड - १९,७२८
केशरी कार्ड - ४५,७३२
नॉन-प्रायोरिटी - ९,६६९
शिधापत्रिकाधारक - ७५,१२९
-----------------------------------------
तालुक्यातील बहुतांश शिधापत्रिकेसंबंधित सर्व कामे ऑनलाइन पूर्ण झाली आहेत. पालघर जिल्ह्यात याबाबतीत डहाणू तालुका प्रथम क्रमांकावर आहे. सर्व रेशनधारकांना नियमितपणे बायोमेट्रिक पद्धतीने धान्यवाटप केले जाते.
- रवींद्र गायकवाड, तालुका अन्नपुरवठा अधिकारी, डहाणू