उल्हासनगर, ता. २६ (वार्ताहर) : उल्हासनगर ४ परिसरातील विठ्ठलवाडी पोलिस ठाण्याच्या हद्दीत कायदा व नैतिकतेला थेट आव्हान देणारा गंभीर प्रकार समोर आला आहे. २५ फेब्रुवारीला रात्रीच्या सुमारास पोलिसांनी श्रीराम चौक परिसरातील एंजल लेडीज सर्व्हिस बारवर छापा टाकला असता, बारमध्ये सुरू असलेले चित्र धक्कादायक होते. विहीत वेळेपेक्षा अधिक काळ सुरू ठेवलेल्या बारमध्ये खुलेआम अश्लील नृत्य सुरू असल्याचे पोलिसांच्या निदर्शनास आले.
पोलिस उपायुक्त सचिन गोरे, सहाय्यक पोलिस आयुक्त अमोल कोळी, वरिष्ठ निरीक्षक अशोक कोळी यांच्या मार्गदर्शनाखाली पथकाने छापा टाकला. यावेळी मोकळ्या जागेत दहा महिला तोकडे कपडे परिधान करून अश्लील हावभाव करत ग्राहकांसमोर गाण्यावर नृत्य करत होते. पोलिस तपासानुसार, बार व्यवस्थापक रफीककुल्ला शेख याने आर्थिक फायद्यासाठी बारमधील कर्मचारी आणि महिला वेटर यांच्याशी संगनमत करून हा प्रकार सुरू ठेवल्याचा आरोप आहे. या बेकायदा कृत्यांमुळे परिसरातील सामाजिक वातावरण बिघडत आहे. तरुण पिढीवरही त्याचा विपरीत परिणाम होत असल्याची भावना नागरिकांतून व्यक्त होत आहे. याप्रकरणी गुन्हा दाखल झाला असून बार व्यवस्थापक, वेटर आणि महिला अशा एकूण १५ जणांविरोधात कारवाई करण्यात आली आहे.