कोकण भवनसमोरील अनधिकृत बांधकामांवर सिडकोची कारवाई
बेलापूर नोडमध्ये भाजी मंडई, फळ मार्केटसह तात्पुरती शेड्स हटवली; साहित्य जप्त
बेलापूर, ता. २८ (बातमीदार) : सिडकोच्या अनधिकृत बांधकामे विभागामार्फत २७ फेब्रुवारी रोजी बेलापूर नोड येथे मोठी निष्कासन मोहीम राबवून सेक्टर १०, भूखंड क्र. ११, कोकण भवनसमोरील सुमारे ६०० चौ.मी. क्षेत्रातील भाजी मंडई, फळ मार्केट तसेच दोन तात्पुरती बांबू-ताडपत्री शेड्स हटविण्यात आली. यासोबतच बेलापूर रेल्वे स्टेशन परिसरातील फेरीवाले, फळविक्रेते व ज्यूस सेंटरवरही कारवाई करण्यात येऊन सर्व साहित्य जप्त करण्यात आले.
सदर बांधकामे सिडकोच्या अधिसूचित जागेवर कोणतीही अधिकृत परवानगी न घेता उभारण्यात आल्याने नियमावलीनुसार कारवाई करण्यात आल्याचे प्रशासनाने स्पष्ट केले. मोहिमेसाठी एक जेसीबी, दोन जीप, दोन ट्रक व २० कामगारांचा वापर करण्यात आला. मुख्य दक्षता अधिकाऱ्यांच्या निर्देशानुसार अतिक्रमण विभागाचे अधिकारी, सिडको पोलीस पथक व सुरक्षा यंत्रणेच्या उपस्थितीत ही कारवाई पार पडली.
चौकट
अनधिकृत बांधकामांवर नियंत्रणाची गरज
शहरात वाढत्या अतिक्रमणांमुळे वाहतूक, स्वच्छता व नागरिकांच्या सुरक्षेचे प्रश्न निर्माण होत असून नियोजनबद्ध विकासासाठी अशा कारवाया सातत्याने होणे आवश्यक असल्याची मागणी नागरिकांकडून व्यक्त होत आहे.