कल्याणच्या गोविंदवाडीत दुर्गंधी
महापौरांच्या आदेशाला केराची टोपली; नगरसेविका समीना शेख यांचा आंदोलनाचा इशारा

डोंबिवली, ता. ३ : रमजानचा पवित्र महिना सुरू असतानाच कल्याण पश्चिमेतील गोविंदवाडी परिसरातील बिस्मिल्ला मशीद परिसरात सांडपाण्याचा प्रश्न गंभीर झाला आहे. ठिकठिकाणी साचलेले घाण पाणी आणि पसरलेल्या दुर्गंधीमुळे स्थानिक रहिवासी आणि नमाजसाठी येणाऱ्या भाविकांचे आरोग्य धोक्यात आले असून, प्रशासनाच्या दुर्लक्षामुळे तीव्र संताप व्यक्त होत आहे.

गोविंदवाडी परिसरात असलेल्या मोठ्या तबेल्यांतून निघणारे सांडपाणी थेट रस्त्यावर येत असल्याची तक्रार नागरिकांनी केली आहे. पाण्याचा निचरा होत नसल्याने डबकी साचली असून, त्यामुळे डासांचा प्रादुर्भाव वाढला आहे. याचा सर्वाधिक त्रास लहान मुले, महिला आणि ज्येष्ठ नागरिकांना सहन करावा लागत आहे.

रमजाननिमित्त दिवसातून पाच वेळा नमाज पठणासाठी मशिदीत मोठी गर्दी असते. मात्र मशिदीच्या प्रवेशद्वारापाशीच सांडपाणी साचल्याने भाविकांना या घाण पाण्यातूनच ये-जा करावी लागते. पवित्र महिन्यात अशा परिस्थितीतून मार्ग काढावा लागत असल्याने स्थानिक मुस्लीम बांधवांमध्ये प्रशासनाविरुद्ध प्रचंड नाराजी आहे.

आदेश कागदावरच?
विशेष म्हणजे गेल्या आठवड्यात कल्याण-डोंबिवलीच्या महापौर हर्षाली चौधरी यांनी स्वतः या भागाची पाहणी करून पाणी उपसण्याचे आणि स्वच्छतेचे कडक निर्देश दिले होते. मात्र अधिकाऱ्यांनी या आदेशाची अद्याप अंमलबजावणी केलेली नाही. वारंवार तक्रारी करूनही प्रशासन झोपले आहे का? महापौरांच्या आदेशानंतरही जर परिस्थिती बदलत नसेल तर हेच साचलेले घाण पाणी महापालिका अधिकाऱ्यांच्या केबिनमध्ये नेऊन टाकू, असा इशारा नगरसेविका समीना सलीम शेख यांनी दिला.