अंबरनाथ (वार्ताहर) : होळीच्या उत्साहात अंबरनाथ पूर्वेतील शिवगंगानगर परिसरातील परिमला सोसायटीत दोन विषारी कोब्रा साप आढळल्याने काही काळ भीतीचे वातावरण निर्माण झाले. सर्पमित्राच्या तत्परतेमुळे दोन्ही सापांना सुरक्षित पकडून वनक्षेत्रात सोडण्यात आले. दुपारच्या सुमारास सोसायटीतील तरुण होळी खेळत असताना कचऱ्याच्या डब्याजवळ संशयास्पद हालचाल दिसली. जवळ जाऊन पाहिले असता दोन साप दिसले. परिस्थितीचे गांभीर्य ओळखून रहिवाशांनी सुरक्षित अंतर राखले आणि तातडीने सर्पमित्र आकाश गोहिल यांना संपर्क साधला. गोहिलने पाहणी केली असता नर-मादी असे चार ते पाच फूट लांब दोन विषारी कोब्रा प्रजातीचे साप आढळले. अत्यंत सावधगिरीने अवघ्या दोन मिनिटांत दोन्ही सापांना सुरक्षितरित्या पकडले. त्यानंतर त्यांना जवळच्या वनक्षेत्रात सोडण्यात आले. या घटनेमुळे काही काळ सोसायटी परिसरात भीतीचे वातावरण होते.