विद्याभवनच्या सुवर्णमहोत्सवी वर्षाला सुरुवात
पन्नास वर्षांच्या शैक्षणिक वाटचालीचा गौरव; सांस्कृतिक कार्यक्रमाने रंगत
घाटकोपर, ता. ११ (बातमीदार) : पुणे विद्यार्थिगृहाच्या विद्याभवन घाटकोपर शाखेच्या सुवर्णमहोत्सवी वर्षाच्या कार्यक्रमांचा शुभारंभ बुधवार (ता. ४) शाळेच्या प्रांगणात उत्साहात पार पडला. ५० वर्षांच्या शैक्षणिक, सांस्कृतिक आणि सामाजिक योगदानाचा गौरव करणारा हा सोहळा दिमाखात साजरा करण्यात आला.
या कार्यक्रमाला प्रमुख पाहुण्या म्हणून मुंबईच्या महापौर रितू तावडे उपस्थित होत्या. त्यांनी शाळेच्या प्रगतीचा आढावा घेत संस्थेच्या कार्याचे कौतुक केले. विद्यार्थ्यांमध्ये उत्तम संस्कार, मूल्ये आणि सामाजिक जाणीव रुजवून आदर्श नागरिक घडवण्याचे कार्य विद्याभवन करत असल्याचे त्यांनी नमूद केले. कार्याध्यक्ष राजेंद्र बोऱ्हाडे यांनी संस्थेच्या यशस्वी वाटचालीचा आढावा घेत पुढील विकास आराखड्याविषयी माहिती दिली. तसेच संस्थेचे माजी कार्याध्यक्ष के. एन. शिरकांडे यांचे मनोगत त्यांच्या पत्नी कल्पना शिरकांडे यांनी वाचून दाखवले. याप्रसंगी संस्थेची ४९ वर्षांची वाटचाल चित्रफितीद्वारे सादर करण्यात आली. सुवर्ण महोत्सवानिमित्त आयोजित संगीत संध्येमुळे कार्यक्रमाला सांस्कृतिक रंगत लाभली.