वाडा, ता. ८ (बातमीदार) ः भिवंडी- वाडा- मनोर रस्त्याच्या काँक्रीटीकरणाच्या कामावेळी ठेकेदाराने रस्त्याच्या कडेलाच विजेचे खांब उभारल्याने अपघातांचा धोका आहे. या प्रकाराची चौकशीची मागणी काँग्रेसचे पालघर जिल्हाध्यक्ष प्रफुल्ल पाटील यांनी जिल्हाधिकाऱ्यांकडे केली आहे.
भिवंडी- वाडा- मनोर रस्त्याचे काँक्रीटीकरणाचे काम हाती घेण्यात आले आहे. या रस्त्यावरील जुने विजेचे खांब बदलण्यात येत आहेत. यासाठी लाखो रुपयांचा खर्च करण्यात येत आहे; मात्र संबंधित खांब रस्त्यालगतच उभारत आहे. काही खांब तर गटारावर उभारण्यात आले आहेत. नियमानुसार रस्त्याच्या मध्यापासून १५ मीटर अंतरावर खांब उभारणे गरजेचे होते; पण रस्त्यालगतच खांब उभारल्यामुळे भविष्यात रस्ता रुंदीकरणावेळी पुन्हा पैसे खर्च करावे लागणार आहेत. त्यामुळे प्रकरणाची चौकशी करण्याची मागणी काँग्रेसचे पालघर जिल्हाध्यक्ष प्रफुल्ल पाटील यांनी तक्रारीत केली आहे. यासंदर्भात ईगल कंपनीचे व्यवस्थापक दिनेशकुमार सिंग यांच्याशी संपर्क साधला असता १५ मीटर अंतरापर्यंत शासनाची जागा नसल्यामुळे रस्त्यालगत काम सुरू असल्याची माहिती त्यांनी दिली.