मुरबाड, ता. ८ (बातमीदार) : जागतिक महिला अधिकार दिन आणि क्रांतिज्योती सावित्रीबाई फुले स्मृतिदिनानिमित्त मंगळवारी (ता. १०) मुरबाड तालुक्यातील चासोळे येथे शेतकरी महिला हक्क मेळावा घेण्यात येणार आहे. जिल्ह्यातील ग्रामीण भागातील शेतकरी महिलांच्या अडचणी समजून त्यांच्या मागण्यांचा जाहीरनामा तयार करण्याच्या उद्देशाने हा मेळावा होणार आहे. वन निकेतन संस्था मुरबाड, श्रमिक मुक्ती संघटना; तसेच काळू धरण प्रकल्प बुडीत क्षेत्रातील ग्रामसभांच्या वतीने श्री क्षेत्र हटकेश्वर मंदिर, चासोळे येथे हा मेळावा होणार आहे. मेळाव्यात प्रस्तावित काळू धरणाचा महिलांच्या जीवनावर होणारा परिणाम, घरठाण–गावठाण संदर्भातील अडचणी, पाणीटंचाई व महिलांचे प्रश्न, सरकारी आरोग्य सेवेतील समस्या, मुलींच्या शिक्षणातील अडथळे तसेच शेतमजुरीसाठी बाहेरगावी जाणाऱ्या स्थलांतरित महिलांच्या समस्या यावर चर्चा केली जाणार आहे.