किनारा फाउंडेशनच्या वतीने महिला प्राचार्याचा सन्मान
पेण, ता. ९ (वार्ताहर) : महिला दिनानिमित्त किनारा फाउंडेशनच्या वतीने जोहे येथील न्यू इंग्लिश स्कूल व ज्युनिअर कॉलेज आणि कन्याप्रशालेतील महिला प्राचार्या यु. एस. गलांडे यांचा सन्मान करण्यात आला. संस्थेचे अध्यक्ष अशोक मोकल यांच्या हस्ते गलांडे यांना गौरविण्यात आले. जागतिक महिला दिनी महिलांचा सन्मान करणे हे आपले कर्तव्य असून ज्यांनी आपल्याला शैक्षणिकदृष्ट्या घडविले ते गुरुवर्य समान या शाळेतील महिला प्राध्यापिका यांचा सन्मान होणे आवश्यक आहे. प्राचार्या गलांडे यांनी आजवर विद्यार्थ्यांना चांगले संस्कार दिले असल्याचे अशोक मोकल यांनी सांगितले. या कार्यक्रमात शाळेतील सहशिक्षक करांडे, ए. डी. पाटील आदींसह कर्मचारी उपस्थित होते.