बदलापूर, ता. १६ (बातमीदार) : महिला दिनाचे औचित्य साधत रोटरी क्लब ऑफ बदलापूर इंडस्ट्रिअल एरिया यांच्या वतीने चाळीशी ओलांडलेल्या महिलांसाठी मॅमोग्राफी तपासणी शिबिर घेण्यात आले. स्तन कर्करोगासारख्या गंभीर आजाराचे वेळेत निदान व्हावे; तसेच महिलांमध्ये आरोग्याबाबत जागरूकता निर्माण व्हावी, या उद्देशाने हा उपक्रम राबविण्यात आला. शिबिराला महिलांचा उत्स्फूर्त प्रतिसाद लाभला असून, ५०हून अधिक महिलांनी तपासणीचा लाभ घेतला.
बदलापूर पूर्व येथील डॉ. प्रकाश राठोड यांच्या ममता हॉस्पिटलमध्ये हे शिबिर झाले. या उपक्रमासाठी डॉ. सविता जावडेकर आणि डॉ. दिलीप मानगेकर यांनी विशेष पुढाकार घेतला. स्तन कर्करोगाचे लवकर निदान होण्यासाठी मॅमोग्राफी तपासणी अत्यंत उपयुक्त ठरते, त्यामुळे महिलांनी नियमित आरोग्य तपासणी करणे गरजेचे असल्याचे तज्ज्ञांनी सांगितले. शिबिरासाठी रोटरी क्लबचे अध्यक्ष अमित पाध्ये व प्रथम महिला अक्षदा पाध्ये यांनी सर्व व्यवस्थेची जबाबदारी सांभाळली. या वेळी डॉ. योगेंद्र जावडेकर, डॉ. शकुंतला चुरी, डॉ. विद्या, तसेच क्लबचे सभासद प्रतिभा, प्रिया, श्याम, अमोल, संगीता, प्रमिला आणि सचिव संतोष यांनी सहकार्य केले. महिलांच्या आरोग्याबाबत जागरूकता वाढविण्यासाठी आणि स्तन कर्करोगाचे वेळेत निदान होण्यासाठी अशा प्रकारचे उपक्रम अत्यंत महत्त्वाचे ठरतात, असे मत यावेळी व्यक्त करण्यात आले.