नवी मुंबई, ता. १६ (वार्ताहर) : बेकायदा हुक्का पार्लर चालवल्याप्रकरणी वाशी पोलिसांनी ८ मार्च रोजी वाशी येथील ग्रीनस्केप इमारतीमधील हाउस ऑफ लॉर्ड या रेस्टॉरंटवर पोलिसांनी छापा मारून कारवाई केली होती. मात्र, पुन्हा छुप्या पद्धतीने हुक्का पार्लर सुरू केल्याने वाशी पोलिसांनी रविवारी (ता. १५) मध्यरात्री या रेस्टॉरंटवर पुन्हा छापा टाकला. या कारवाईत पोलिसांनी व्यवस्थापकासह तिघांवर गुन्हा दाखल केला आहे. तसेच घटनास्थळावरून हुक्क्याचे साहित्य आणि सुगंधी तंबाखू जप्त केला आहे.

वाशी येथील सेक्टर-३०, ग्रीनस्केप बिल्डिंगमधील हाउस ऑफ लॉर्ड या रेस्टॉरंटमध्ये ग्राहकांना बेकायदा हुक्का पुरविला जात असल्याची माहिती पोलिसांना मिळाली होती. त्यानुसार रविवारी मध्यरात्री सव्वाबारा वाजण्याच्या सुमारास वाशी पोलिसांनी या ठिकाणी छापा टाकला. या वेळी काही ग्राहक निकोटीनयुक्त आणि तंबाखूजन्य पदार्थांचे सेवन करताना आढळून आले. या कारवाईदरम्यान पोलिसांनी घटनास्थळावरुन वेगवेगळ्या कंपनीचे सुगंधी फ्लेवर्स, सिल्व्हर फॉईल लावलेले हुक्का पॉट आणि नळ्या असा मुद्देमाल हस्तगत केला आहे. वाशी पोलिसांनी व्यवस्थापक कनलजित सिंग सरवन सिंग बेला (वय ३३), वेटर स्वप्नील शिंदे (वय ३२) आणि इम्रान अब्दुल हमीद हुसेन (वय २५, रा. पनवेल) व धर्मेंद्रकुमार सत्तेलाल सिंग (रा. वाशी) यांच्या विरुद्ध गुन्हा दाखल करून तिघांना ताब्यात घेतले.