उरण, ता. १७ (बातमीदार) : थकीत मालमत्ता कर वारंवार नोटीस देऊनही न भरल्याने धुतुम ग्रामपंचायतीने जप्तीची कारवाई करत राधा ऑटो केअर हा पेट्रोल पंप सील केला आहे.

धुतुममधील या पेट्रोल पंपाकडे एकूण २१ लाख १५ हजार ७७७ रुपये करापोटी थकीत होते. कराची वसुली न झाल्याने पंपावरील कार्यालय, सेल्स रूम आणि सीएनजी युनिटला सील ठोकण्यात आले आहे. गटविकास अधिकारी सर्जेराव पाटील यांच्या मार्गदर्शनाखाली आणि विस्तार अधिकारी विनोद मिंडे यांच्या उपस्थितीत पंचनामा करून ही कारवाई पूर्ण करण्यात आली. धुतुम सरपंच सुचिता ठाकूर आणि ग्रामविकास अधिकारी नागनाथ भाडगे यांनी ही जप्तीची प्रक्रिया राबवली. या वेळी ग्रामपंचायत सदस्यही उपस्थित होते.

संबंधित मालमत्ताधारकाला गेल्या वर्षी १५ ऑक्टोबर आणि १ डिसेंबरला मागणी देयक व रिट नोटीस देण्यात आली होती, तरीही कराचा भरणा न केल्याने टोकाची भूमिका घ्यावी लागली. जप्तीनंतरही १५ दिवसांत रक्कम न भरल्यास जप्त मालमत्ता विकून वसुली करण्याची तरतूद कायद्यात असल्याचेही ग्रामपंचायत प्रशासनाने सांगितले.